27 aprel kuni darknetdagi maydonchalardan birida muallif «Kiberxavfsizlik markazi» xodimlarining shaxsiy ma’lumotlari sifatida taqdim etgan ma’lumotlarni sotish haqida e’lon paydo bo‘ldi. U go‘yoki «ichki tizimlarga kirib borilganini» da’vo qildi va «dalil» sifatida 100 kishiga oid ma’lumotlardan parchani e’lon qildi.
E’londa ism va familiyalar, lavozimlar, shuningdek qisman yashirilgan PINFLlar tilga olingan. Bundan tashqari, muallif kattaroq to‘plamlar va «yanada maxfiy» ma’lumotlar ham borligini aytib, ularni 200 ming dollarga baholadi va keyingi e’lonlar bilan tahdid qildi.
«Kiberxavfsizlik markazi»da bayon qilishicha, sizib chiqish bo‘lmagan. Idora ma’lumotiga ko‘ra, dastlabki tekshiruv shuni ko‘rsatdiki: ichki axborot tizimlari buzib kirilmagan, bunday turdagi ma’lumotlar bazalari esa muassasada qo‘llanilmaydi.
Shu bilan birga, Kun.uz’ning ma’lumotiga ko‘ra, Markaz nashrga bergan izohida e’londa tilga olingan shaxslar haqiqatan ham uning xodimlari ekanini tasdiqlagan. Biroq muassasada ta’kidlashicha: ma’lumotlar ichki tizimlarni buzish natijasida olinmagan.
«E’lon qilingan ma’lumotlardan ko‘rinib turibdiki, ular ancha eski. Ehtimol, hujum ish haqi hisoblash tizimiga yoki boshqa serverdagi ma’lumotlarga bo‘lgan bo‘lishi mumkin. Hozir biz sizib chiqishning ehtimoliy manbalarini navbatma-navbat tekshiryapmiz. Biroq bu “Kiberxavfsizlik markazi” tizimlarining buzib kirilishi emas», — deya xabar berishdi muassasada.
Markaz matbuot kotibi Dilshod Turaevning aniqlik kiritishicha, ma’lumotlarning bir qismi — familiyalar va lavozimlar — rasmiy saytida ochiq manbalarda joylashtirilgan. Uning so‘zlariga ko‘ra, PINFL raqamlari Markaz tizimlarining komprometatsiyasi natijasida olinishi mumkin emas.
