Energetika vazirligi jamoatchilik muhokamasiga elektromobillarni zaryadlash infratuzilmasini tubdan takomillashtirish bo‘yicha chora-tadbirlar to‘g‘risidagi loyihani kiritdi. Unda zaryadlash vaqtida elektr energiyasi xarajatlarining bir qismini kompensatsiya qilish nazarda tutilgan.
Loyihaga ko‘ra, 2030 yil 31 dekabrgacha Davlat byudjeti mablag‘lari hisobidan elektromobillarni zaryadlash stansiyalarida iste’mol qilinadigan 1 kVt·soat elektr energiyasi qiymatining 300 soʻm kVt·soat uchun miqdoridan oshadigan qismini qoplab berish taklif etilmoqda.
«Agar II guruh iste’molchilari uchun tarif 1 000 soʻm/kVt·soat darajasida qabul qilinsa, subsidiya miqdori 700 soʻm/kVt·soatni tashkil etadi. Shundan kelib chiqib, Davlat byudjeti hisobidan qoplanadigan xarajatlar hajmi 2026 yilda (to‘liq yil hisobida) 246 mlrd soʻm, 2030 yilga kelib esa — 819 mlrd soʻm darajasida prognoz qilinmoqda», — deyiladi tushuntirish xatida.
Shu bilan birga, hujjatda subsidiya mexanizmi 2026 yil 1 maydan nazarda tutilgani qayd etilgan, shu sababli 2026 yildagi byudjetning haqiqiy xarajatlarini 8 oy uchun mutanosib hisoblash — taxminan 164 mlrd soʻm — taklif etilmoqda.
Subsidiyalar jismoniy shaxslarning jami daromadiga kiritilishi rejalashtirilmagan. Mablag‘larni o‘tkazish soliq organlariga yuklanishi ko‘zda tutilmoqda: to‘lovlar har oy Soliq mobil ilovasi orqali fuqarolarning bank kartalariga amalga oshiriladi.
Ta’kidlanishicha, joriy yilda elektr energiyasi qiymatining bir qismini qoplash ikkinchi chorak yakunlari bo‘yicha Davlat byudjeti daromadlar qismining ortiqcha bajarilishi hisobidan moliyalashtiriladi, keyingi yillarda esa mablag‘larni Davlat byudjeti to‘g‘risidagi qonunlarda belgilab qo‘yish rejalashtirilmoqda.
Kutilishicha, mazkur chora o‘rta muddatli istiqbolda zaryadlash infratuzilmasidan foydalanishni rag‘batlantirish, transport sohasida energiya resurslaridan foydalanish samaradorligini oshirish va uglevodorod yoqilg‘isiga bo‘lgan talabni kamaytirish hisobiga ijobiy iqtisodiy samara beradi. Loyiha muhokamasi 17 maygacha davom etadi.
