8 may kuni Moskvada O‘zbekiston Respublikasi Prezidenti Shavkat Mirziyoyev va Rossiya Federatsiyasi Prezidenti Vladimir Putin o‘rtasida Rossiya poytaxtidagi tadbirlar dasturi doirasida uchrashuv bo‘lib o‘tdi. Suhbat avvalida davlat rahbarlari G‘alabaning 81 yilligi munosabati bilan bir-birlarini samimiy tabrikladilar.
Matbuot xizmati xabar berganidek, tomonlar oliy darajadagi avvalgi aloqalar chog‘ida erishilgan kelishuvlarni amalda ro‘yobga chiqarish nuqtayi nazaridan O‘zbekiston—Rossiya munosabatlarining har tomonlama strategik sheriklik va ittifoqchilikni yanada mustahkamlash masalalarini ko‘rib chiqdilar. Savdo hajmlarining barqaror o‘sishi hamda sanoat, energetika, metallurgiya va boshqa tarmoqlardagi loyihalarning muvaffaqiyatli amalga oshirilayotgani mamnuniyat bilan qayd etildi.
Tovar ayirboshlash dinamikasini saqlab qolish va ustuvor tarmoqlarda kooperatsiya loyihalarini jadallashtirish, shuningdek hududlar darajasida faol aloqalarni davom ettirish uchun muvofiqlashtirilgan chora-tadbirlarni qabul qilish muhimligi alohida ta’kidlandi. Bundan tashqari, madaniy-gumanitar almashinuvning jadal sur’atlarda davom etishini ta’minlash masalasiga alohida e’tibor qaratildi; yetakchilar xalqaro kun tartibi bo‘yicha ham fikr almashdilar.
